政情：鐵頭仁自爆通假波出院
政制及內地事務局局長「林公公」林瑞麟尋日入院通波仔一事引嚟政壇極度關注，白鴿黨主席「鐵頭仁」何俊仁話，相信有得通波仔都唔係好嚴重嘅問題，仲自爆自己兩年前都試過「通假波」，最後仲健健康康咁出院添！
鐵頭仁話兩年前參加一個泰國醫療旅行團，去港區全國人大代表陳智思開辦嘅醫院做身體檢查，點知血管造影嘅結果一出，醫生就話佢有血管塞咗，叫佢拿拿臨返港睇醫生。穩陣起見，佢返到香港仲搵咗港大心臟科教授睇報告，當時教授都認為要通波仔，咁佢就乖乖去做啦。
點知去到瑪麗醫院做手術時，醫生幫佢插咗導管入身體，先話佢血管非常健康，唔使通波仔嘞，結果佢轉頭就出咗院。佢話相信係照血管造影時有部分血管重疊，先令到血管好似塞咗咁。雖然捱一針仲無喇喇大髀多撻瘌，但佢都話安全至上，痛一下唔緊要喎！
何俊仁