政情：王雪紅忍術打造台股王

相信冇投資者鍾意坐艇，但如果長揸時收嘅紅股利息，仲賺番個開，咁呢項投資仍然係你贏。講嘅唔係港股，係台灣股王HTC呀。前嗰排佢嘅市值爬咗RIM頭，依家仲多過諾基亞，高達三百三十五億美元。

台灣嘅股王舊年大執位，如日方中嘅HTC由八百蚊（台幣．下同）一路飆，最後衝破千元大關，重奪失落已久嘅股王寶座。呢兩日HTC試圖挑戰歷史最高1,220元，睇嚟好快可以寫下台股史上千元股王兩度刷新紀錄嘅首例。

1,220元呢個價位已經係五年前嘅事，期間共四次配股派息，合計回報率高達九成六，就算未沽都已經賺咗嘞。

呢五年HTC嘅市值升咗三十幾倍，但依家股王呢個位比以前仲架勢，RIM同諾基亞都係佢嘅手下敗將。HTC董事長王雪紅話，阿媽嘅教誨就係忍耐，凡事唔好只睇眼前，要睇遠啲。咦？呢句話都幾啱HTC嘅小股東喎。