政情：搞搞政：特首辦中文域名獻世

由於政府被鬧爆同「80後」溝通不足兼諮詢方法落後，於是特首辦補鑊搞咗個上亞厘畢道facebook，尋日仲公布特首辦全中文域名「特首辦.政府.香港」已啟用，只要喺域名前加上www. 就可以瀏覽特首辦網頁嘞！

當特首辦沾沾自喜當正呢個係新猷之際，大家會發現雖然用中文域名入呢個網頁，但條link係即時變番英文，咁把鬼咩！跟住仲畀網民鬧鑊甘。

有網民喺網頁留言話多此一舉，另有網民直斥「個idea真係白癡先諗得出」。亦有網民質疑打英文快定係打中文快，唔好忘記唔係人人識睇或識打中文，點解只得繁體版、冇簡體版？

另一網民仲話：「呢啲嘢，只係啲商家諗出嚟，賺取利益嘅工具（中文網址有咗好多年，未興過，甚至……冇人識，亦無需要），有廿六個英文字母唔打，走去打五千幾個中文字……哀。」

嗱！睇到呢啲網民嘅留言，就可以知道呢個中文域名嘅反應幾咁惡劣，簡直係本末倒置，特首辦變咗特「蠢」辦，好心特首辦主任譚志源諗多啲創新兼有用嘅嘢喇。