政情：叛將翻舊帳 民協勁頭痕

近年民協內部嘅糾紛浪接浪，繼前黨友官世亮因穿櫃桶底被革出黨後，佢哋亦將要與另一位前黨友對簿公堂。

甄啟榮唔認加入西九新動力

話說民協嘅甄啟榮喺○七年區議會選舉截止報名前，突然申請退黨，殺咗民協一個措手不及，最後由於民協已趕唔切補位，佢喺冇泛民對手下成功當選，唔少民協人至今對此事相當介懷。繼而早前又被人民力量成員指佢喺○八嘅立法會選舉幫建制派嘅「鼠王芬」梁美芬助選，被質疑與建制派關係曖昧。

甄啟榮呻話自退黨後，民協喺地區「追殺」佢，當區嘅區議員仲以聯署形式向街坊派單張，話佢已加入鼠王芬嘅「西九新動力」，又派人喺佢辦事處門外搞健康檢查等地區工作，擺明踩場。

佢尋日進行絕地反擊，發聲明強調自己冇加入西九新動力，仲話自己修讀法律時同鼠王芬識於微時，當時幫佢助選時只係當佢係獨立學者，此後已無任何關聯。不過佢亦主動認衰，話支持鼠王芬令一班民主派朋友誤會失望，搞到佢好不安，佢都坦然接受外界嘅批評喎。但對於一班前黨友，佢就好決絕，仲話自己早於二月已向民協發出律師信，但至今未收到任何回覆。

民協嘅立法會議員馮檢基（KK）對甄啟榮向傳媒爆大鑊，顯然感到唔多高興，斥對方既然已透過法律處理事件，如今又公開件事，明顯係想煲大自己、抹黑民協。佢強調該黨講嘅所有都係事實，至於甄啟榮係咪真係西九新動力嘅成員，佢就話要視乎成員嘅定義喎，而民協亦於兩周前決定會透過律師發回覆畀對方。

喺○七年區選失利嘅民協，近年銳意收復失地，但黨內糾紛不絕，再加上選民力量早前高調話喺區選狙擊民協，依家仲惹上官司，簡直係頭頭碰着黑，睇嚟KK都好頭痕。