政情：大輝蛀牙痛上頭冇聲出

立法會尋日開始辯論預算案，好多議員都排晒隊發言，不過立法會廠商會代表林大輝尋日就粒聲唔出，今日第二日辯論都唔知可唔可以發言，因為大輝「牙痛慘過大病」，仲因為牙痛牽連頸、下顎、眉骨、耳仔全部都痛。

大輝尋日喺立會枯坐時，不時愁眉深鎖，有乜煩惱呀？佢透露已經牙痛咗四日，早前上咗南京考察睇唔到醫生，連粥都食唔到，尋日返到香港，就第一時間去睇牙醫，醫生話佢右上顎最入嘅兩隻大牙蛀咗，因為隔咗幾日冇處理，已經化膿，仲入咗骨添！由於傷患發炎，要遲啲先可以剝牙，所以大輝仲要捱多幾日痛！