政情：任總網誌晒墨寶靚相
金管局前總裁任志剛退任後開咗個網誌，成為佢對金融事務發表意見嘅平台，近日佢嘅網誌靜雞雞搞新意思，主要係兩大變化，一係網誌嘅個人照片換咗張西裝相，取代以前喺西貢蚺蛇尖嘅行山相。另一個變化係相邊有佢個簽名，係用毛筆寫嘅中文名，係咪任總嘅墨寶就不得而知。
任總退下火線時話要學hea，由佢○九年九月開咗個blog後，共更新過二十五次，多數係將公開演講文章擺上去，對上一次更新已經係五個月前，唔知係咪忙教書同中國金融學會執行副會長嘅工作，搞到網誌更新愈來愈疏呢？
任總個網誌又有新搞作。