政情：搞搞政：金勞詹爆粗論盡預算案

立法會近年多咗一啲衝動派議員，甚至喺議會爆粗，尋日立法會一連兩日辯論「史上最廢」預算案，金融服務界議員詹培忠講講吓忽然遊花園，更收唔到口爆粗，事後雖然願意改口，但都趁機揶揄立法會主席主持會議嘅手法，質疑好多議員爆粗時佢都冇出聲。

金勞詹尋日發言時，望實個鐘講足十五分鐘，佢嘅立場係撐政府，但發言邏輯就有啲亂，譬如佢一面大鬧泛民主派反對派六千蚊，另一面質疑中產人士喺預算案中係咪真係無得益。跟住將香港同澳門比，話本港引以為傲嘅金融業一年只帶來二百一十億元印花稅收，仲要部分其實係來自樓宇交易，反觀澳門一年博彩稅收分分鐘有九百億元，如果香港要開賭又會點呢？

吓？點解有呢個假設呢？金勞詹冇解釋，只係自問自答話：「咪被人鬧到死、通俗啲即係被人鬧到X街！」佢爆粗後即時畀立法會主席制止，金勞詹其後都願意改口講「PK」，不過，今次爆粗真係好無厘頭噃！