政情：袁彌明認無牌籌款
前港姐袁彌明從政熱情高漲，仲埋咗以狙擊民主黨及民協等為目標嘅政團選民力量，但我哋尋日收到讀者報料，話選民力量去年十一月喺大圍火車站外擺檔籌款，因冇申請相關牌照而畀警方檢控。報料人仲話，呢類罪行好難有足夠證據檢控，但由於選民力量將活動圖片，包括印有佢哋標誌嘅籌款箱連捐款都上埋網，證據確鑿。
唔少選民力量成員接受查詢都支吾以對，袁彌明就口直心快，坦承佢哋擺街站時係冇攞牌籌款，但強調佢哋係有苦衷喎，佢話嗰次係選民登記活動，並非刻意籌款。但選民力量主席林雨陽就話，未收過檢控通知。