政情：派錢民望跌 孖曾瘀到爆

尋日立法會開始辯論新一份預算案，自從政府補鑊式宣布大擲三百六十億元向港人派錢六千蚊後，財爺鬍鬚曾挾銀紙要脅立法會盡快通過預算案，一副志得意滿嘅樣。不過，最新一期港大民調發現，政府宣布派錢之後，受訪市民對政府表現嘅不滿有增冇減，尤其係改善民生一瓣，調查亦發現愈後生嘅人對政府表現愈反感，派錢都可以派到民望插水，孖曾真係瘀到冇人有！

六成青年不滿政府

港大上個月十四號至二十三號訪問咗過千個市民，了解佢哋對曾蔭權同特區政府嘅睇法，仲問埋對政府喺維持經濟繁榮、改善民生、推行民主步伐等五個範疇嘅意見，結果發現，曾蔭權民望再度插水，評分為五十點二，唔滿意政府表現嘅受訪者更高達四成。

講到五項施政範疇，市民最絕望嘅就係改善民生，共有五十三個百分比嘅受訪者表示唔滿意，滿意率凈值達負百分之三十五，創舊年以嚟新高；至於維持經濟繁榮表現嘅滿意凈值亦錄得負百分之三。呢項調查仲發現，年齡介乎十八至二十九歲嘅80後、90後青年人對政府表現不滿度最高，共有五成九受訪青年表示不滿政府表現，不滿比例係咁多個年齡組別中最高嘅。

後生仔反政府早已響起警號，特區政府高官卻似乎一啲都唔上心，民望再咁插落去，真係好易硬着陸㗎！