「龔如心遺囑害慘我」

回首往事，再看現在，陳振聰感慨萬分。他自言為爭產案付出了沉重的代價，而且始料不及、萬萬想不到。事到如今，他坦認○六年遺囑給了他很大麻煩，成為他的負累，更可能害他慘痛收場，「如果佢嘅遺產只係留低一幅佢畫嘅畫畀我，我寧願要幅畫，咁就無人會爭，就好開心啦，仲可以拎番屋企睇住。」但陳振聰堅稱無造假，所以無悔當初，可是他知道已無回頭路，事情已不是他能控制。

「我唔可以話自己係一個好清高唔貪錢嘅人，我只係一個普通人，絕對唔係聖人……」

陳振聰在爭產案中兩連敗，把最後希望放在終審法院。由拿出龔如心○六年遺囑的那一刻，直至引發世紀爭產官司、私情曝光，家庭受傷害，輸了官司又涉偽造文件被捕，花了大筆錢兼賠上自己和龔如心的聲譽，陳振聰泥足深陷，更被外界視為貪錢的結果。對此，陳振聰說：「我唔可以話自己係一個好清高唔貪錢嘅人，我只係一個普通人，絕對唔係聖人，但係龔如心將遺囑交畀我之前，我真係唔知嘅，佢交畀我之後一再叮囑我要收好。」

他語帶唏噓地說，情人的離去，留下一紙遺囑成為他的負累，可能會改變他下半生，「事實就係一個負擔。」陳振聰說，曾問龔為何將遺產交給他，龔答他：「要繼續生意吖嘛！啱啱先將生意做好，一定要做落去。」又說龔知道他將來會做好事。陳稱一直不想接受龔的遺囑，並曾多番推辭，「响養和醫院時，我再三叫佢考慮清楚，我話：你任何時間要我掰爛佢（遺囑），我都可以交番畀你，因為呢件事對我一定影響好大。」

陳說，自從去年初被警方拘捕後，自己曾反思「我有無咩做錯呢」？並開始覺得一紙遺囑令自己和家庭帶來愈來愈多麻煩，「唉，點解龔如心搞到咁呢？如果佢長命啲就好啦。」他說：「如果佢去（離世）之前一日叫我扔咗（遺囑），咁我就完全無事啦，我會活得好開心！」

既然當初意識到會惹麻煩，為何又要拿出遺囑？陳振聰說，是因為龔如心的交託，「由龔如心過身嗰一秒鐘開始，我一定要完成佢叫我做嘅嘢。」「我一路叫佢收番（遺囑），仲同佢講：你好番先畀我啦！但到佢過身後我再無掙扎，因為佢不下無數次交託畀我，呢件任務我唔可以唔做，我好愛佢，我同佢相處咁多年無做過咩重大功勞，所以呢件事我一定要做好！」直至龔離世，他決定公開○六年遺囑，堅決要「做好呢件事」。

陳振聰稱，剛開始時他覺得這是一件簡單的事，他當時亦不熟悉遺產的事，以為大家都可以接受，所以很願意和龔家坐下傾。他透露曾與龔家在四季酒店開會，商討是否有和解可能，「當時龔仁心、中心和因心都有出席，我係想談判，我無底線。」他說，會議開了兩天，到第三日龔仁心再無出現，之後討論中斷，再後來便發生爭產案。

陳振聰說，其實最大壓力是來自爭產案一開始時，律師為了要證明「陳振聰」的「存在」，告訴他其所有私生活以及與龔的私照均會暴露人前，「呢樣嘢係我最唔想最唔想嘅事，因為每個人都有自己私隱，尤其是對我屋企、太太造成嘅傷害十分之大。」當時他沒機會徵得太太同意便聽從了律師意見，「因為律師話我必須要咁做。」

「無後悔，唔應該後悔，亦唔容許我後悔，但係好辛苦。」

「呢件事係一件極痛苦嘅事，如果時光可以倒流，我但願啲相可以唔使出去（公開），如果官司可以進行，公義可以尋求，私事又唔使披露當然係最好。」他承認，公開二人關係是對不起龔如心，「我覺得對佢好大影響，其實我係好遺憾。」他又用「吃藥有副作用」來比喻迫於無奈公開私情帶來的負面影響。他說，太太譚妙清每次提到此事都會「好唔開心，會瞓唔着覺」，又不知道怎樣才可以修復夫妻間的傷害，唯一可以做的就是減少討論，希望時間可以淡化事情。

陳振聰說，這件轟動的爭產案也令他成為市民眼中「有趣的動物」，但可以講無惡意，「同我影吓相、行埋嚟笑吓問我係咪（陳振聰）。」甚至在酒店有國內同胞讚他「叻」，他都一笑置之。陳苦笑說，自己與龔如心命運相似，同因為一紙遺囑捲入民事及刑事案，但他不會預期會否與龔一樣得到「奇迹」，「其實真就係真，唔係奇迹。」他說，一紙遺囑「可以令我好慘，多數唔會好好，就算還我公道，我都會好忙、好慘」。所以，陳振聰說，寧願龔如心留給他一幅親筆畫。

但是事到如今，前路險峻，可有後悔？陳振聰神情凝重地說：「無後悔，唔應該後悔，亦唔容許我後悔，但係好辛苦。」他說，最不甘心「被屈成不清不白」，現時心中最想的只是「還我清白」，「唯有我百分之一百知道我無造假，依家龔如心唔喺度，仲有邊個最清楚？就係我一個知我真係無造假，我係喺佢手度攞番來。」