因循苟且混日子　膽小怕事無靈魂

政府無道，必然眾叛親離，人人喊打。所以，近年唔少前高官紛紛掉轉槍頭，抨擊當局施政失當，悖逆民意，絕不令人意外。呢嗱，防止虐待兒童會總幹事雷張慎佳啱啱退休之嘛，尋日就發炮轟擊政府部門種種惡習歪風，真係句句到肉，彈無虛發。

雷太雖非高官，但主政防虐會廿八年，算係半個建制中人，過往鮮有抨擊政府，上月底卸任回復自由身，隨即反戈一擊，唔使講，心中怨憤必定已經積壓咗多年喇。雷太有感而發話，從事兒童工作數十寒暑，看盡政府官僚百態，馬虎因循、膽小怕事嘅有，少做少錯、有錯就卸鑊嘅又有，對此感到難過及憤怒。

雷太投身社福工作幾十年，同官員交手無數，佢對港府嘅點評，一針見血，可信性無可置疑。有人問，究竟邊個部門、邊位官員馬虎因循、膽小怕事呢？其實計太一叮話齋，成個政府由上至下都係咁，好難講雷太所指嘅係邊個。

唔係咩？夕陽政府剩餘一年幾任期，成班高官做一日和尚敲一日鐘，有冇做好呢份工，全港市民有目共睹。好簡單，香港一切長遠政策，例如復建居屋、安老政策、全民退休保障同醫療改革等具爭議性嘅問題，全部被掃入地氈底，留畀下屆政府執手尾，家陣成部政府機器好似時鐘停擺咁，郁都唔識郁。咁樣嘅政府，有邊個部門唔係馬虎因循、膽小怕事，有邊個高官唔係抱住少做少錯、唔做唔錯嘅心態混日子吖？

長遠政策束之高閣，眼前施政更加一塌糊塗。遠嘅唔講，就講迫在眉睫嘅內地孕婦湧港產子問題，呢個計時炸彈存在已久，對本港婦產科服務衝擊之大、隱患之深，連牛頭角順嫂都知啦，但港府就一直放任懶理，要等到醫護界怒吼，當局先至知驚補鑊，話要限制內地孕婦來港產子喎。叮，踢一踢，郁一郁，呢啲就係港府嘅最大特色喇！

最低工資更加搞到滿城風雨，立法原意本為保障基層勞工，緩和貧富對立氣氛，但由於指引不清，飯鐘錢同休息日計薪問題觸發勞資雙方大鬥法，打工仔利益更無保障，勞資關係更加惡化，你話呢個政府係咪無事生非、添煩添亂吖？

一句講晒，上樑不正下樑歪，成個政府冇晒靈魂，好似行屍走肉，已經無得救嘅嘞。事到如今，市民難過同憤怒都冇用，餘下一年幾，惟有自求多福喇！