政情：張堅庭拍片輸畀大仔
演而優則導嘅張堅庭尋日同太太楊諾思及三名子女出席一個攝影比賽頒獎禮及展覽，張堅庭話，佢嘅大仔都好鍾意攝影，亦喜歡電影拍攝，完全遺傳咗佢嘅基因，提到大仔拍攝嘅短片早前喺康城參賽，張堅庭笑言：「依家拍嘢好易，有部電腦就得，冇以前咁複雜。」
影圈有唔少父子檔，咁張堅庭有冇諗過培養個仔做接班人呢？佢話：「佢咁嘅年紀拍片仲多過我，我已經叫早入行，佢仲早。」佢不經意已經披露咗個仔入咗行！同阿仔感情好好嘅張堅庭又透露，阿仔嘅初戀只維持咗三個禮拜，依家亦冇拖拍，唔使擔心佢有冇親密照。
張堅庭一家五口撐「愛．女孩」攝影比賽頒獎典禮。
張堅庭大仔（右）鍾意攝影及拍片，父子有傾有講、感情好好。