政情：雷張慎佳退休即轟庸官
虐兒、家暴問題不絕，喺保護兒童方面工作約三十年嘅防止虐待兒童會前總幹事雷張慎佳今個月就會正式退休，佢尋日喺《香港家書》中繼續鞭策政府，不點名炮轟部分政府官員及民間團體「馬虎因循、為人膽小怕事、表面化」，以為少做少錯，有錯就推到別人身上，不敢向當權者發聲，實在令人難過及憤怒，結果阻礙咗家庭同社會發展。
究竟雷太暗批緊邊個，佢並冇明顯暗示。雷太又話，現時兒童問題愈趨複雜，所以要求政府設立兒童事務專員，以制訂兒童事務機制，保障小朋友權益。
不過，雷太話多年來亦喺社會上遇到好多有心人，為兒童權益「從黑髮做到白髮、從健康做到病」，寄語各方繼續齊心為兒童服務，落實暴力零容忍。