政情：發叔何君堯冤家路窄
新界鄉村嘅村代表及鄉事委員會選舉早排落幕，鄉議局幾個重量級人物都遇到挑戰，尋日佢哋一齊出席鄉議局新大樓入伙禮，行會成員兼鄉議會主席劉皇發同屯門鄉委會新主席何君堯碰面，彼此好大方，熱情握手仲寒暄幾句。
不過，何君堯畢竟係新人，好多鄉紳對佢都比較陌生，見到佢都各自竊竊私語，有鄉紳仲話：「呢，嗰個咪係同發叔爭主席嘅何君堯囉！」成功取代林偉強做坪洲鄉委會主席嘅黃漢權尋日都有出席，但就唔見佢同林偉強有特別交流，黃漢權笑笑口話，自己一直喺坪洲打躉，將來到市區開鄉議局執委會認真山長水遠，但為街坊做嘢遠啲都冇所謂喎。
何君堯（右）一到場即同劉皇發問好，似乎冇為早前嘅選舉傷和氣。