政情：謝凌潔貞情書教女拍拖
情書唔單只係愛嘅見證，仲可以用嚟教仔女拍拖。教育局常任秘書長謝凌潔貞尋日出席港大一個活動時，透露大學時同當年嘅師兄拍拖，不過，到依家仲有儲住師兄寫畀佢嘅情信，仲會攞畀兩個囡囡睇，畀囡囡睇好優美嘅言情文筆，又可以教導佢哋禮儀。
謝太話，呢段Puppy Love嘅主要拍拖節目就係約埋去圖書館坐隔籬位溫書，所以，即使喺校園拍拖，都冇影響佢繁重嘅學業同工作。而師兄讀文科，中文同英文嘅書信都寫得唔錯，可以趁機教吓女兒對正常男女社交嘅禮儀。呢個媽咪咁開通，兩個女兒拍拖都唔使收收埋埋喇。
回憶大學生活，謝太仲話，由大學一年級已開始加入學生會，一路到大三，除咗搞學生會外，佢仲要幫人補習賺外快，加埋拍拖，雖然分心好多瓣，但好彩一一兼顧到。