政情：范太局外人懶理立會暴力
立法會最近收緊咗《議事規則》，賦權各委員會主席趕議員離場。全國人大常委、前立法會主席范徐麗泰似乎都冇眼睇，尋日佢話收緊規則係議員嘅群體智慧，加上佢又無身歷其境，咪即管試吓得唔得囉﹗記得范太做主席時都冇發生啲咁嘅事，依家搞成咁，難怪不在其位嘅范太都闊佬懶理。
范太尋日現身一個活動時被問到收緊規則嘅問題，佢覺得今時唔同往日，當年佢做主席嘅情況同依家唔同，既然依家各黨派議員都覺得有需要，佢哋咪收緊規則囉﹗不過，佢都認為依家有小部分市民，學咗小部分以激烈方式表達意見嘅議員，呢個係社會主流意見唔贊同嘅，因為大家都珍惜互相尊重嘅文明社會嘛﹗
講到尾，范太笑笑口話實情佢依家都唔係主席，冇身歷其境，不如大家都係問番一眾立法會議員啦﹗可見范太到咗心如止水嘅境界。