政情：卓永興玩殘飲食業

爭拗多年的最低工資下個月便會實施，但本港餐飲、清潔、保安等行業卻紛紛爆改簽新約紛爭，事關僱主聯合會早前發聲明提醒各中小企要研究同僱員嘅合約，搞到好多中小企都因新合約而勞資關係緊張。有小企業東主更擔心員工玩嘢、搞喎！呢段時間尤其係復活節嘅市道，揸頸就命之下猛鬧政府高官打工都好似發緊夢咁，樣樣慢三拍，勞工處處長卓永興係咪蝸牛上身㗎？！

驚員工復活節玩o野

舊年年尾，臨時最低工資委員會已經傳出攞到時薪二十八蚊嘅共識，但政府一直冇同業界打招呼，亦冇提醒中小企可能存在合約違規嘅問題，遲至上個月，僱主聯合會公開發聲明，先敲響中小企業對新僱傭合約嘅關注。原來二十八蚊時薪落實後，飯鐘、休息日、獎金可能都要重新計過，唔少茶餐廳東主相繼同員工傾緊新合約，由於只有唔夠一個月時間，據講唔少夥計都有反彈情緒。

有東主直言，依家真係揸頸就命，因為今個月有唔少公眾假期，清明、復活節假期都係飲食及服務業嘅高峰期，生意多本來係好事，弊在家吓僱傭傾緊新合約，啲小老闆又驚員工唔肯簽新約，又驚佢哋不滿，喺假期中玩嘢影響生意；亦有清潔業嘅負責人致電電台，擔心如果有員工唔做，短時期難搵人。

中小企係商界主力，近排已經有唔少人質疑點解政府唔喺立法過程中早啲提醒業界？勞工處更要遲到好多行業因為重訂合約爆出糾紛，先慢吞吞拋出行業例子出來？卓永興喺食環署時，表現已備受批評，嚟到勞工處又係後知後覺，旨意佢真係死梗，你話最低工資點會唔搞到一鑊泡？