加車稅阿茂整餅 搞環保弄巧反拙

夕陽政府萬事哀，施政一鑊泡唔在講，連制訂政策都諗邊瓣衰邊瓣。史上最廢預算案派錢派出個大頭佛，就算財政司司長曾俊華跪低投降，仲有大把手尾跟，隨時可能出現新一輪行政立法大晒冷。

預算案建議增加汽車首次登記稅，平均加幅百分之十五。講真，通脹肆虐仲要加稅已經夠荒謬啦，而港府嘅所謂理由更加無厘頭，聲稱為咗減少私家車數量，紓緩塞車同污染問題喎。

點知建議一提出，立法會各大政黨罕有咁一致反對，連建制派議員都唔畀面，要求修改，否則拒絕收貨。比起○三年大幅增加汽車首次登記稅，今次反對聲音有過之而無不及。

當局加稅嘅理由就夠晒動聽嘞，不過只要用腦諗吓就會發現九唔搭八。正如有議員質疑，咁搞法可能令原本打算購買新車嘅市民改變主意買二手車，亦可能有車主被迫放棄買較環保嘅新車，到頭來可能適得其反，達唔到減排效果，反而令污染惡化添。

叮佢個鎯鎯！買唔環保嘅舊車唔使畀稅，買環保嘅新車反而要加稅，港府官僚到底係咪用腦諗嘢o架？鼓勵減排居然變咗懲罰環保，簡直係添煩添亂。

至於所謂紓緩塞車咯喎，呢個理據同樣站唔住腳。有立法會議員指出，○三年加車稅之後，私家車數目照樣上升。再講遠啲，紅隧加隧道費，咪一樣日日塞爆，所以話，增加汽車首次登記稅根本唔係對付塞車嘅有效方法。

仲有吖，港府嗰頭以首次登記稅七折優惠鼓勵市民買環保車，呢頭又話要加稅紓緩塞車，簡直係自相矛盾，自打嘴巴，唔通環保車就唔會令交通擠塞？

鬍鬚曾向中產人士開刀嘅陰招畀人睇穿，引起一片噓聲，唔止泛民反對，連建制派都唔買帳，佢哋達成共識，要求喺三種情況下豁免加稅，包括預算案公布前已經落咗訂、棄舊車換新車同埋購買環保車。

叮！呢啲咪叫民意囉。太一叮真係晒頭，實際可行嘅措施，議員諗得出，點解班自命不凡嘅官僚諗唔出呢？

得道多助，失道寡助。家陣大部分政黨都話到明唔支持增加汽車首次登記稅，如果港府一意孤行夾硬嚟，一定撞大板。咪話太一叮唔提醒，當局除咗認衰讓步，已經冇其他路可行，如果到時又「甩轆」，加稅建議通唔過，咁就真係自取其辱喇，叮！