政情：「李特首」再插無能煲呔曾
早前喺青協論壇上單挑港鐵主席錢果豐一舉成名，而被同學稱呼為「李特首」嘅中五學生李佳斌，尋日喺大氣電波上再次狠批煲呔曾需要為本港各樣深層次矛盾負責，又認為政府扶貧不力，好多老人家為兩餐仍然要去執紙皮，仲話自己若果做到特首，第一時間會去幫呢批最有需要嘅人。
李佳斌自言從未參加過遊行示威，平時反而鍾意做義工，自己對政治嘅興趣源自睇歷史書，從歷史中可以睇到一個模式，就係好多領導人年輕時都胸懷大志，憂國憂民，但到真正手握權力後就用盡辦法剷除異己，行為同年輕時有天壤之別喎。煲呔曾最叻就係用人唯親，唔知李佳斌係唔係暗諷緊佢呢？
