政情：搞搞政：克勤仔新公職多魚

尋日喺最新一期嘅《憲報》，赫然發現建仔嘅立法會議員陳克勤加入咗海魚獎學金顧問委員會，到底呢個委員會負責做啲乜？相信好少人知，驟眼睇落同克勤仔又好似冇乜關係，唔通佢除咗貓貓狗狗之外，連海魚都撈埋？抑或係想取代黨友漁農界代表「肥根」黃容根呢？

克勤仔就解釋，海魚獎學金顧委會係魚類統營顧問委員會轄下一個小組，呢個係鼓勵漁民休漁期進修嘅機制，希望佢哋學習不同知識，日後轉型都易啲，而小組就負責審批申請。原來佢喺舊年已加入魚類統營顧委會，咁啱海魚獎學金顧委會換屆，要搵新血加入，佢聽落覺得幾有意思，評估過工作量唔算太多，所以就點頭入局。

政府有「六六規條」嘅限制，克勤仔話肥根已經到咗極限，所以要褪番個位出嚟，佢仲叫大家唔好諗多咗，因為呢個安排同漁農界換位冇關，只係建仔內部覺得要補番個位，佢先企出嚟頂埋啫！