政情：和廣北打破嚴肅晒幽默
銀行公會主席和廣北，平時畀人嘅印象係好嚴肅，原來佢都有幽默嘅一面㗎！事緣尋日銀公例會後，和廣北就照例出嚟同傳媒傾吓偈，一班攝記見到和總出現，即刻蜂擁上前影相，點知和總影緊相嗰陣，突然爆肚問，其實佢個樣一直冇變，點解次次都要影相？而有攝記反應敏捷咁話：「咁我日日都食飯啦。」聽後，和總都忍唔住露出會心微笑。
跟住和總好有風度咁企喺度畀攝記任影，影到七七八八時仲反幽一默，叫攝記：「多吃（意即影相）一點。」換嚟全場陣陣笑聲。唔單止咁，記者會途中有家傳媒支咪冧咗，佢就停低講話耐心咁等人整番支咪，但重新開始時佢又搞笑咁話，唔記得咗頭先講咗乜嘢？