政情：7A總裁出口術撐自己友

曾七度獲《環球金融》雜誌評選A級，有「7A總裁」美譽嘅台灣央行總裁彭淮南，一啲都唔會輸蝕畀其他財金部門阿頭。為咗隨時掌握最新嘅財金資訊，佢都有用iPhone。但咁樣咪好唔畀面自己友HTC？醒到加零一嘅彭淮南即刻回應「我仲未買啫」！

智慧型手機大行其道，台灣嘅財金首長大都配備iPad。彭淮南深知呢啲潮物好重要，所以特登搵咗央行資訊部門嘅主管，幫佢惡補點樣使用咁新嘅科技產品。佢好老實話自己冇iPad，但就有用iPhone，出埠仲一定要用，因為喺外國真係好好用。

呢個答案可能同央行突然加息咁震撼，當記者知道總裁咁緊貼潮流，都忍唔住發出驚呼聲。之不過，點解唔揀本土品牌HTC呢？HTC嘅股價會唔會應聲下跌㗎？彭淮南即刻補上一句：「我只係未買啫。」咁總裁用iPhone又有乜心得呢？眼見離題，總裁即回應「呢啲同貨幣政策無關」！