政情：被爆剝削合約工 張建宗火燒後欄

勞工及福利局局長張建宗呢排頻頻爆大鑊，繼早前嘅新交通津貼計劃爭議，近日推出嘅最低工資僱傭指引又搞到一鑊粥，辣着打工仔同老闆，怒火愈燒愈猛，唔知點收科？點知仲有鑊甘嘅跟住嚟。

被投訴加班冇補水

點解咁講？眾所周知，本港嘅貧富懸殊問題愈嚟愈嚴重，勞資糾紛同社福事故鑊鑊新鮮鑊鑊甘，令勞工處同社會福利署工作量不斷增加，但礙於政府喺年前凍結招聘長俸制公務員，令呢兩個重災區部門只能請埋大批合約同臨時員工、再瘋狂加班趕工頂住先。由於佢哋嘅聘用條件較長俸公務員差，自然唔會甘心蝕畀政府，當然好睇重超時補水嘅問題。

有員工近日就以匿名方式向工聯會立法會議員葉偉明投訴，指遭上司或部門主管要求長期同長時間加班，但不獲任何補償，而且員工肯唔肯無償加班，仲會成為考核工作表現同考慮晉升嘅準則之一。

勞福局嘅職責就係維護全港打工仔嘅福祉，加上煲呔曾啱啱先喺施政報告下令張建宗就標準工時問題展開研究，該局反而帶頭剝削員工，實在非常諷刺。計埋最低工資僱傭指引夾擊下，張建宗真係火燒後欄呀！

葉偉明隨即喺下周三嘅立法會大會提出質詢，要求張建宗交代勞福局、勞工處同社署係咪已經全面實施五天工作周、各職級每周嘅標準工時係幾多、員工無償加班嘅情況有幾普遍，以及會否就其他政府部門、以至本港各行各業僱員嘅無償加班問題進行專項統計。如果佢最後答應進行有關統計，班員工隨時又要開多幾晚夜先做得掂，令超時工作問題惡化。