橋躉移位非小事 庸官死撐更荒唐

大家唔知仲記唔記得呢，幾年前，美國明尼蘇達州發生一單冧橋死人慘劇。一條橫跨密西西比河嘅大橋橋身斷開三橛，當時正係交通繁忙時間，幾十架車跌晒落水，連人帶車被河水沖走，事件中死傷過百人，真係慘不忍睹。

太一叮舊事重提，係因為呢種冧橋死人嘅事分分鐘會喺香港上演。遠嘅唔講，先排本報就踢爆，東區走廊近興發街支路橋躉移位，嚇到全人類鼻哥窿冇肉。咁嘅事唔係講笑㗎，東區走廊由朝到晚車水馬龍，若果條橋「嘭」一聲冧低，唔知幾多人跌落維港餵魚。

港島交通要道發生險情，當局理應高度重視，但勢估唔到，路政署署長劉家強滋油淡定，話係小事嚟啫。人命關天，佢居然唔嗲唔吊，梗係激起公憤啦，尋日立法會炮聲隆隆，尊貴嘅議員紛紛質疑當局後知後覺，又冇主動公布事件。

點知劉家強實牙實齒話從來無當移位係小事。不過，佢又講，橋躉移動兩厘米唔係大問題，所以冇公布咁話。哈，自打嘴巴！

大佬呀，係唔係大問題，唔可以下巴輕輕亂下結論㗎。俗語話，千里之堤，潰於蟻穴，無論幾大嘅工程都會因為細微漏洞毀於一旦。東區走廊每日有成千上萬嘅車經過，橋躉移位絕對唔係小事。署長大人瞞天過海，大事化小，小事化無，簡直係草菅人命。

劉家強仲死撐路政署唔係後知後覺，又話當時冇公布，係因為怕造成資訊氾濫咁話。問題係，市民怕嘅唔係資訊氾濫，而係橋毀人亡。市民有權知道，自己經過嘅道路究竟發生咗乜嘢事，冇理由無辜辜身陷險境都唔知。劉家強刻意隱瞞事故，唔單止剝奪市民嘅知情權，直情係靠害！叮！

話時話，做香港人都幾可悲，連自己日日經過嘅橋發生咗乜嘢事都冇權知，咁人身安全有乜保障呀？更弊嘅係，甩皮甩骨嘅橋絕對唔止一條，呢，本報早前踢爆，沙田石門交匯處有條天橋落成不過二十年，已經石屎剝落、鋼筋外露、石壆有罅，橋躉泥土幾近流失，橋底地面仲有個大窿，足足可以容納一個人出入。而路政署唔知係真傻定係扮懵，居然打死都話條橋「結構穩固，無損安全」。

仲係嗰句，官府靠得住，豬乸會上樹。本港道路橋樑危機四伏，分分鐘會變成路人陷阱。大家千祈唔好信劉家強之流嘅鬼話，行路過橋都要打醒十二分精神，唔係嘅話，大禍臨頭仲未知發生乜事。叮！