政情：陳奕迅化身火神撐體育
早前成為首位被國家運動隊邀請成為榮譽會員嘅Eason陳奕迅，將聯同王力宏、蕭敬騰同李宇春，參加下月一同二號喺北京水立方舉行嘅水舞間式「非凡之旅」慈善音樂騷。四人化身火神、水神、冰王子及仙子，同國家跳水同花泳隊運動員何姿、何沖、吳敏霞、金晶等跨界攜手合作。有關活動嘅收益將全數捐畀中國運動員基金會，用嚟改善內地偏遠同貧困地區學校嘅體育設施。
今次被邀演出嘅四位歌手係由國家隊一班運動員內部選出嚟，當中以Eason票數最高，跳水選手何姿同拍檔何沖將首度開金口，演繹偶像Eason嘅作品《兄弟》，之前仲特別向佢請教歌藝補課，大讚偶像平易近人。
陳奕迅（左起）、李宇春、王力宏、蕭敬騰同一眾國家隊選手，將於四月一、二號喺水立方演出多媒體音樂騷《非凡之旅》。