政情：美聯太子女升副主席
近期美聯集團有唔少人事變動，執行董事郭應龍早兩個禮拜辭咗執董個位，轉任集團中國部聯席行政總裁，尋日又將副主席鄧美梨個位一拆二，佢嘅愛女黃靜怡，同美聯台柱之一嘅黃錦康齊齊升任副主席。
黃靜怡係美聯主席黃建業同鄧美梨嘅愛女，今年至三十歲，○八年三月加入美聯做執行董事，咁快就再升呢。鄧美梨則退下火線，只做執董。
黃錦康一直都係美聯嘅高級執行董事，依家升呢做副主席。點解升佢兩位？美聯話主要係兩人共同領導嘅主席辦公室自○八年成立以嚟，喺好多重大決策上都有舉足輕重嘅貢獻，對集團發展功不可沒。
