政情：搞搞政：金勞詹要規管長者籌款

政府扶貧同關顧長者不力，慈善團體惟有靠自己。但立法會金融服務界代表「金勞詹」詹培忠喺聽日立法會大會上提出嘅書面質詢，話金鐘地鐵站附近愈嚟愈多長者喺街頭籌款，有市民擔心拒絕捐錢會顯得冷酷而感到有壓力，希望當局檢討批出籌款嘅規定喎！咁係咪想趕絕啲長者先？

金勞詹話質詢講嘅市民包括佢在內，佢試過被要求捐款，搞到好尷尬，尤其啲籌款活動係由長者或坐輪椅嘅傷殘人士做前線，如果唔捐好似好冷血，但捐又覺得幫唔到咁多，都唔知點算好。佢話唔係想慳一千幾百，而係唔知嗰啲係咪真係慈善團體，又覺得老人家喺路邊行嚟行去好易撞親，咁多團體一齊籌款效率又低，不如要政府加強規管，比較有錢嘅組織就唔畀去籌款。

如果佢咁擔心老人家，不如呼籲佢啲金融界嘅朋友直接向慈善機構捐款啦，間間都夠資源時，咪唔會阻住佢行路囉！