政情：張文夢會華叔遇野豬
創立教協嘅司徒華逝世兩個幾月，身為徒弟嘅白鴿黨立法會議員張文光自爆早前曾夢見恩師。
喺夢境裏面，張文同華叔搭緊巴士入元朗，齊齊去視察教協一個新會址。喺兩人落車行去會址期間，一直有講有笑，但突然條街走咗隻大野豬出嚟擋路，心急嘅張文即刻一手護住華叔，一腳伸開隻野豬，點知現實中佢其實係一腳踢落老婆身上，即時畀老婆搖醒哦咗佢一輪，好彩冇踢到老婆周身瘀啫。
有時夢境會反映人嘅潛意識，唔通教協買新會址唔順利，令張文夢到有野豬擋路？佢就嘆口氣話，依家仲未買到新會址，但就唔方便透露詳情，希望今年內可以完成交易，一圓華叔心願。
