政情：富貴黨新黨徽 畀網民惡搞

尋日至講過，富貴黨為咗破舊立新，前日隆重其事，搵公關公司搞咗場大騷，黨高層同青年團一齊出嚟宣布以新黨徽示人，以示改革嘅決心，希望一洗畀人話富貴嘅黨形象。

其實，新黨徽前日一出台，已經有人話似銀行logo，所謂道高一尺、魔高一丈，新黨徽曝光唔夠四十八小時，迅即畀網民惡搞，喺新黨徽中兩個圓形圖案上加兩筆，變成貌似金錢代號。

雖然網民惡搞個新黨徽，但富貴黨決心以實際行動進行改革。據悉，早前高調升呢做該黨榮譽主席嘅田北俊已痛定思痛，總結經驗，認清形勢，最近更積極四出同各區鄉事會打定招呼，更瞄準同建仔唔多咬弦嘅北區重點出擊，勢要由區議會選舉開始箍票箍到立法會選舉。