政情：懶管光污染潘潔推字訣

香港號稱「東方之珠」，但呢粒明珠近年有愈嚟愈光嘅趨勢，半夜三更都「光燦燦」，擾人清夢之餘亦浪費電力。政府早前公布顧問公司做嘅研究，結果發現超過七成回應者認為本港有光污染問題，要求立法規管嘅呼聲愈嚟愈大。不過，今屆政府任期得番嗰一年多啲，仲點會同你搞咁多嘢吖！咁點算？政府除咗嗰招「先諮詢、再檢討、再諮詢」，一味靠拖之外，仲出新招添呀！

立法會環境事務委員會尋日首次傾光污染問題，好多議員急不及待追問當局幾時就光污染立法。署理環境局局長潘潔就話，政府會先向業界推出一份自願性嘅《戶外燈光裝置業界良好作業指引》，呼籲業界遵從，然後再成立專責小組，由商界、居民同環保組織代表就一啲技術標準傾番一年半載，以取社會共識。至於立法呢？政府唔會排除咁嘅可能性嘅。即係唔係依家做啦！

聽落政府好似做咗好多嘢，但一心想立法嘅議員當然唔收貨，有泛民主派嘅議員當場踢爆，話當局草擬嘅《作業指引》，根本連標準都未有，用埋晒啲「建議只維持必須的照明在可接受的水平內」、「當不需要時關掉戶外燈光裝置」咁嘅字眼，鬆到唔鬆，根本冇牙力，搵鬼跟咩！白鴿黨嘅「高達」李永達就乾脆踢爆環境局拖得就拖嘅策略，當面寸潘潔「睇嚟冇番六至十年都唔使旨意立到法」。

推個波畀下屆政府

眼見拖字訣危危乎，潘潔就補多招「推字訣」，將個波推走。佢話，光污染涉及唔同行業，本港城市環境又特殊，唔可以一刀切立法。

政府所以會喺今年第二季成立專責小組，由唔同階層嘅代表傾個規管準則出嚟。咁要幾耐時間？唔多唔少，啱啱一年，到時囉喎，個波已經推咗畀下屆政府啦！