短打長擊：周一鑊道歉難息醫生怒火

食衞局局長周一鑊開口夾着脷，公立醫院醫生做到陀陀轉，只不過係爭取合理工時，佢就聲大大話公院醫生對工作及薪酬斤斤計較，燃起醫生熊熊怒火。估唔到平時講嘢冇神冇氣嘅周一鑊，原來係煽風點火嘅能手。今趟周一鑊毫無常識嘅言論，睇怕即使向牛魔王之妻鐵扇公主借到芭蕉扇，亦難以平息全港公院醫生積壓多時嘅怒火。

三個醫生組織正向醫管局申請，在全港公院當眼地方，張貼三款要求周一鑊下台、道歉及落實合理工時的海報。其中一幅海報最令人動容，道盡長期人手不足、醫生急就章為病人診症要快的無奈：三分鐘去看有十三種長期疾病的李伯伯；負責照顧凌晨一點中風入院梁太的醫生，已連續十六小時工作……周一鑊一句「斤斤計較」傷盡全港公院醫生的心。佢自己位高權重，官做久了就只會隨口噏當秘笈，可是前線醫生仍有良知。

現代臨床醫學之父奧斯勒醫生，在《行醫的金科玉律》指出：行醫是一種藝術而非交易，是一種使命而非行業，所以要求「用心如同用腦」。奧斯勒的意思是指醫生絕不只是在治療一種疾病，而是在醫治一個活生生、有情感、正為疾病所苦的人，因此所謂「心」就是設身處地與無微不至的關懷。

如今，在人手不足下，全港公院醫生用三分鐘睇一個病人，如此匆忙，有乜可能「用心用腦」？只能把病人當成一個號碼。公院醫生要找回「心」，爭取合理工時有理！周一鑊抹黑醫生，理應下台！