禍從口出惹怒火　就算道歉又如何

食物及衞生局局長周一嶽多咗個花名叫「周斤斤」，係公立醫院醫生幫佢改嘅，聽落好似金舖嘅名，但大家咪誤會呀，呢個花名唔係表揚周一嶽牙齒當金使，而係話佢口臭兼口衰，抹黑前線醫生對工時同薪酬「斤斤計較」，挑起醫生無名怒火，勢要火燒呢隻「周一鑊」！

周一嶽禍從口出辣慶醫生，被要求落台回家，面對群情洶湧，佢終於跪低認衰，話「斤斤計較」論可能令部分醫生不滿，感到受辱，願意就此致歉喎。呢，骨科出身嘅周一嶽幫病人睇骨駁骨叻唔叻就唔知，但縮骨最耍家，連道歉都縮骨過人o架，「耍冧」完之後，繼續死撐，話醫生係專業服務，「需要高度專業精神，時刻幫助病人」。叮！死不悔改！

錯就要認，打就企定。特區高官講多錯多，失言丟臉，簡直係家常便飯，見怪不怪咯。遠嘅唔講，早前政務司司長唐英年口出惡言，向「八十後」開炮，一句「車毀人亡」，惹到一身蟻，碰到一面灰；依家周一嶽又因一句「斤斤計較」，落得狼狽道歉收場。唉，可能呢啲就叫物以類聚、人以群分啦，有咁無能嘅政府，就有咁無能嘅官員。

講番周一嶽呢鑊，佢衰口臭係自取其辱，道歉只係最起碼嘅政治動作，最重要嘅仲係搞番掂醫管局呢個爛攤子。公立醫院長期人手不足，前線醫生工時過長，士氣低落，怨氣瀕「臨界點」，係不爭嘅事實，周一獄身為本港醫療系統最高官員，點可以將問題拖得就拖、卸得就卸o架！

無錯，醫護行業性質特殊，工作應以病人利益為先，但正正因為要替病人着想，周一嶽同醫管局對解決醫生荒更加責無旁貸。正如前線醫生爆料，有關問題已經嚴重影響公營醫療服務質素，例如門診醫生用三分鐘診症，兩小時內要巡視二十九個病人，如此情況，試問如何確保病人得到應有診治同照顧？再講，醫生都係血肉之軀，長期超時工作，身心疲勞，長此下去，難保唔會爆出醫療事故，到時受害嘅咪又係無辜病人。

最令人難以接受嘅係，醫管局嘅「奴工」制度並非一視同仁，有前線醫生每周工作一百小時，超標一倍有多，但醫管局嗰班高高在上嘅行政人員就實行標準工時，咁又點能夠怪前線醫生發動杏林革命，向港府宣戰？一言以蔽之，周一嶽咪以為一句不情不願嘅「道歉」，就可以化解危機，核心問題一日未解決，前線醫生遲早爆大鑊，到時周一嶽你就真係大大鑊喇，叮！