政情：李家傑享受湊仔公生活
恒基主席李兆基大仔李家傑舊年喜獲三胞胎後，要照顧三個仔，公開應酬都減少咗，尋日佢出席富豪二代組成嘅「百仁基金」喺元朗八鄉舉行嘅別開生面生態文化之旅時，透露好享受湊仔公生活，睇佢尋日嘅表現，湊BB似乎令佢心態愈嚟愈後生。
李家傑尋日着波鞋、牛仔褲到場，比起平時西裝一度更加朝氣勃勃，佢除咗同一班兄弟姊妹睇吓鄉村風光外，仲食盆菜。講到三胞胎，李家傑話佢哋健康又活潑，講起時個樣都好happy。尋日大家嘅話題離唔開日本地震，李家傑都話對早前嘅搶鹽荒好驚訝。已故富商張祝珊後人許明明就關注日本化妝品會否受輻射污染，唔想白滑肌膚受影響喎。
滋味盆菜當前，李家傑（前排左二）同施榮忻（前排右二）齊齊起筷，品嘗圍村風味。
許明明（中）等一眾姊妹食盆菜時都非常斯文。