政情：廖偉麟炒寫字樓有斬獲
樓市近日出現一陣冷風，唔少人都話要睇定啲。不過，百仁基金委員兼紀惠集團副主席廖偉麟（Jeffrey）尋日就透露，優質寫字樓依然大有可為，佢早前掃灣仔區寫字樓，短短幾個月就錄得豐厚利潤。
近期投資市場唔少人討論股神巴菲特話可以趁低投資日本嘅言論，Jeffrey對日本投資冇乜回應，但就對本地寫字樓市道別有一番見解。佢話，政府早前打擊炒樓，資金早已轉炒寫字樓。以中環環球大廈甲級寫字樓為例，呎價高達二萬五千元，較去年尾上升近百分之二十，但Jeffrey發現乙級寫字樓水位更高，灣仔區平均呎價只介乎六千至七千元，呎價相對大落後。
