政情：搞搞政：煲呔曾腳軟 青年勿近

若果話勇者無懼，失民心者大概就腳震難行。煲呔曾早前到科學館出席一公開活動時，雖然已有十多名G4同康文署職員保護，但仍然敵唔過數名80、90後青年示威者，差啲畀人掟中粟米斑塊飯，進場時仲聲稱畀人撞中心口，搞到要去醫院驗傷，失禮兼失威。事發後警方大舉加強對煲呔曾等一眾高官嘅公眾活動保安安排，自絕於民兼浪費公帑。

尋日煲呔曾出席一項有上千名90後學生出席嘅活動，雖則係由被視為親政府嘅香港青年協會主辦，但咁多人出席，總冇可能保證一定唔會出事，吃過90後虧嘅煲呔曾自然腳都軟埋，自己帶備嘅警方保鏢已不計其數，仲有會場同青協嘅保安人員，粗略估計最少三十人包圍住佢同其他嘉賓入場。據聞部分保安人員更係特別為今次活動而請嘅，不過就唔知係由青協定係會場方面負責畀錢。

煲呔曾進場發表一輪無聊演說後，冇同在場青年對談就匆匆離開，非常冇誠意。離開時當然又係幾十人包圍住佢咁走，全程冇人示威、冇人掟飯、冇人撞心口，大家冇工開不妨考慮吓應徵做煲呔曾嘅保安。