政情：勞永樂考慮返社民連

社民連早前因創黨主席黃毓民同現任主席陶君行不和而大分裂，毓民雖扯走大批會員過另起爐灶成立嘅「人民力量」，不過，因唔妥毓民而退黨嘅成員又出現另一波入黨潮，繼前秘書長季詩傑早前正式重返社民連後，據了解，年前因會址風波而毅然退黨嘅前醫學界議員勞永樂亦醞釀回巢。

我哋尋日向勞醫生證實傳聞真偽，佢承認自己正審慎考慮當中，現階段仲未拍板係咪入番黨。佢話，自己由始至終都忠於「社民理念」，奈何自己第一次加入社民連後，黨內卻爭拗不絕，大家只識花九牛二虎之力搞人事鬥爭，令佢做唔到想做嘅嘢，如今社民連大分裂，雖然紛爭少咗，但佢仍要觀察耐啲至可決定。

勞醫生又坦言，自己周不時都同社民連人士見面，亦非常留意佢哋嘅最新動向。但問到佢有冇計劃下屆再循港島區出選立法會，佢就不置可否，笑言現階段仲係言之過早喎。