政情：李君夏蒲荷李活道睇玉
告別警隊多時嘅首位華人警務處處長李君夏，退休後醉心鑽研古董、古玉，周不時喺荷李活道一帶出現，已成「熟客仔」，同嗰度一啲店舖相熟。據講，今年已七十三歲嘅李君夏，原來已有成三十幾年研究古玉嘅經驗，有過千年以上歷史嘅遠古玉器更係佢嘅心頭好。
日前，佢喺荷李活道一間店舖內打躉，同幾個友好排排坐睇古玉，邊睇邊交流心得。見佢兩手各攞住一件玉器，左捽捽、右摸摸，睇得全神貫注，就咁坐足三粒鐘，至五點仲意猶未盡，同友人再去另一間舖頭睇多半粒鐘，之後又去另一間睇過，最後成六點先離開。
其中一間舖頭老闆娘話，同李君夏相識二十幾年，大讚佢好好人，從來冇架子，大家好啱傾。
李君夏兩手各執一件玉器左捽右摸，愛不釋手。