政情：騎劫天籟村姑 張建宗大隻講

政府高官經常都唱好自己嘅政績，日前畀立法會泛民主派議員列為今年應該減薪嘅勞工及福利局局長張建宗尋日就做真人示範，佢出席第八屆香港展能節嘅活動時，就借有「天籟村姑」之稱嘅英國歌手Susan Boyle為例，鼓勵啲殘疾人士將殘疾轉化為能力，跟住仲大言不慚咁話政府為殘疾人士工作投入咗幾多錢。不過，大家只要睇吓殘疾院舍輪候時間，同殘疾人士爭取多年嘅權利都無法落實，就知道張建宗都係大隻講，抵佢畀人叫減人工啦！

張建宗尋日喺個活動中致辭，劈頭就收買人心，話殘疾人士係政府一直重點關心嘅對象，新財政年度用喺呢方面嘅資金高達三十七億元，淨係新服務就用咗一億四千萬元，跟住又話多咗二百幾個日間訓練名額。佢跟住引天籟村姑嘅說話：「不應讓任何的殘障成為生命的障礙，要將殘疾轉化為能力。」

逼成年殘疾人士離宿舍

Susan呢句話講得好勵志，弊在張建宗錯誤引用，仲用嚟推銷政府協助殘疾人士就業、支持佢哋自力更生等。譬如張建宗將區議會同社福機構搞嘅唔少活動，如復康日等，攞嚟做政績就係一例，好多本港殘疾人士都覺得政府冇重視佢哋，簡單如政府發布重大政策時，有冇安排手語繙譯就係一例，呢個安排喺好多國家都落實咗，但香港地仲係話之你。

更加唔好話好多殘疾人士爭取多年嘅院舍問題，家吓據報每年都有五、六千人輪候入住各類殘疾人士宿位，但政府只打算推自負盈虧計劃，甚至有意令十八歲以上嘅殘疾人士離開宿舍，啲殘疾人士都話，住嘅問題未解決，點樣自立、自力更生呢？天籟村姑都要有個天才表演嘅機會先可以一炮成名，好心張建宗唔好借村姑過橋啦。