食署監管甩漏 龍宮淪為龕場

海洋世界神奇美麗，弊在食環署累人累物累到落海底，搞到龍宮變骨灰龕場，海水受污染，隨時可能演變成生態災難。

食環署幾年前將本港部分海域劃為骨灰撒放點。雖然當局死口唔認，不過係人都知呢招係為公營骨灰龕位長期供應不足「補鑊」啦。

有漁民團體收到投訴，話捕魚嗰陣經常網到骨灰龕，認真大吉利是。長洲有漁民舊年喺南丫島附近海域，一次過網起四、五十個頂部有紅布包裹嘅骨灰龕，部分仲附有「某地先人」布條，呢家嘢佢哋捕魚幾十年從未見過。

漁民話，海上撒灰場設置約一年之後，類似情況開始出現。少則一、兩個，有時三、四個，令漁民非常困擾。佢哋話骨灰龕喺海底出現係因為食環署對海上撒骨灰活動監管不力，擔心海洋受污染，魚獲食落肚引起健康問題，咁就大鑊嘞。叮！

查實，食環署嘅「傑作」又點止呢單吖，除咗龍宮變龕場，仲有骨灰變魚糧，令香港呢個美食天堂多咗樣佳餚叫「骨灰魚」，呢單醜聞相信各位都仲記得。

舊年年初食環署免費提供渡船接載死者家屬到指定海域撒放骨灰，點知被踢爆海葬船未駛到指定範圍就喺魚排同泳灘附近撒放骨灰。因為違規作業來回可慳一粒鐘燃油費，結果船家捨遠取近，署方不聞不問。

叮！食環署有心做騷，無心辦事。海葬安排立立亂，監管甩甩漏，唔止污染環境，仲係對先人嘅大不敬。其實海葬作為殯葬儀式嘅一種，本身並無問題，但監管唔可以兒戲。家陣亂撒一通不特止，仲成個骨灰龕揼落海底，簡直離晒大譜。

食環署失職，先人難安息。其實歸根究柢都係因為港府長期唔肯正視公營龕位供求嚴重失衡所致。欠帳太多，又唔肯增撥資源從根本上解決問題，頭痛醫頭，腳痛醫腳，結果咪衰完一鑊又一鑊囉。

根據食環署嘅數字，公營骨灰龕位嘅平均輪候時間係三十個月，最長嘅要等四年幾。近年涉嫌違法興建嘅私營骨灰龕場愈揭愈多，但港府一直唔肯面對問題。迫於民間壓力推出嘅首份私營骨灰龕場名單，對有關龕場有冇違規不置可否，要消費者自己決定買唔買龕位。唔單止冇為孝子賢孫釋除疑慮，反而增添煩惱。

香港地生者難安身，死者難安息，家陣連海龍王都不得安寧。到時天怒人怨，睇吓跛腳鴨政府撐得幾耐。叮！