SUN世代：團購網領袖三絕招創業

潮流興團購，團購網站如雨後春筍，開到成行成市，想在芸芸團購網中突圍而出，更加困難。但在港創辦uBuyiBuy團購網站的楊聖武（Danny），不單於短短半年內，已令公司在行內獨佔鰲頭，更火速被美國團購網巨頭Groupon收購。外界看來，或會以為這是一個萬中無一的創業神話，受盡幸運之神眷顧，但其實一切都在Danny的部署和掌握中。要成功創業，除靠時機和運氣，原來尚講求三招必勝技：「要對個行業有passion（熱情）、唔怕畀人潑冷水，仲要好勤力同畀好多心機。」

身為美國大公司的香港區CEO，可能你會以為這樣的高層，工作只是指指點點，可以好「他條」，但訪問當日下午二時，Danny尚未「食晏」，之後只叫外賣「醫肚」，因為他每事親力親為。「我依家平均每日都做十二至十四個鐘，之前仲試過做通宵，我覺得as a leader（作為一個領袖），每一個department（部門）我都要好清楚，就算有個同事離職，我都應該做到佢嘅position（崗位）。」

Danny三十出頭，是一個典型年輕有為男士。他自小在美國讀書、長大，說話時夾雜滿口英文。他十八歲時，已一邊讀書，一邊在IT公司兼職，做有關互聯網的工作。他更非常有生意頭腦，二十五歲就踏上創業路，三次創業聽落都一帆風順，無甚波折。「第一次係喺美國引入『許留山』嘅經營權，之後賣咗畀人；跟住轉做酒店傢俬生意，澳門許多大酒店都係我哋客戶；上年諗到uBuyiBuy嘅idea，上年三月就搬嚟香港搞。」

開業半年已被收購

團購網站uBuyiBuy甫推出就深受歡迎，網站每二十四小時推出低價的產品或服務優惠，種類由船票、漢堡包、電視機、漂牙和美容服務都有，消費者得益之餘，商戶亦大收宣傳之效。網站曾在單日錄得高達三百萬元營業額，Danny更形容公司第七個月的收入，是首月的二十倍，賺錢速度驚人，難怪開業半年就被美國團購網巨頭Groupon收購。

「一切都係timing（時機）同luck（運氣）。」Danny謙稱，自己只是將Groupon在美國的一套運作模式，照辦煮碗帶來香港，不過，被收購亦在他計劃之內：「見到Groupon發展得好快，知道佢要入中國市場，會收購香港團購網站，初時預計年半會被收購，點知結果仲快過預期。」

Danny今日的成功，似是唾手可得，實際亦經歷過一番考驗。「有呢個idea時，好多大公司都唔睇好，因為話就話網上購物愈趨普遍，但喺香港實際會上網買嘢嘅人，比率只得五成，而且香港太方便，覺得呢個model唔會work。」不過，他相信只要公司能夠給予客人信心，就會成功，最終亦證明其眼光準繩。

綜合三次成功經驗，Danny傳授想創業年輕人三招：「要鍾意個行業；如果諗到好嘅idea，就算十個人有九個唔睇好，都唔好怕畀人潑冷水，要堅持；仲要好勤力同畀好多心機。」

至於Danny不斷「跳來跳去」做不同生意，他說：「好鍾意開始新嘅嘢，百分之九十九會在三、四年之後就有一個新開始。」那何時又有下一個「新開始」？他笑言：「依家好忙，暫時未諗住，目前網站仲有好大發展空間，仲有好多嘢可以establish。」

Danny's Profile

學歷：三藩市大學信息系統管理學位

現職：Groupon（HK）CEO

曾創辦業務：

美國引入許留山特許經營權

酒店傢俬

uBuyiBuy.com