政情：「硬頸」棠哥重出江湖

早前做完頸椎手術嘅行政會議成員兼工聯會會長鄭耀棠，一路冇再喺各大小場合現身，尋日終於重現江湖，出席香港中國企業協會廿周年酒會，好多政商界好友都熱情上前同佢握手問好。

手術後首次露面嘅棠哥睇嚟比之前又清減咗，但笑容滿面，精神唔錯。見佢用條黑色頸巾包實條頸，動作明顯放慢咗，又唔可以隨意轉動條頸，逢親有人喺側面或後面同佢打招呼，佢就要成個人轉身同人眼神接觸，動作好似機械人。棠哥就話依家康復情況好好，但每個禮拜都要做兩次物理治療。

手術後首次喺公眾場合露面嘅棠哥，精神唔錯，但動作好似機械人。