政情：搞搞政：王桂壎入政圈南海幫？

經濟動力尋日搞咗個研討會，請嚟嘅四大商會、學者同律師會代表都狂插競爭法。唔知係咪怕受靶，所以負責呢瓣嘅商務及經濟發展局並冇派官員到場，反而見到律師會會長王桂壎同經濟動力嘅立法會議員林健鋒一見面就攬頭攬頸。咁friend？跟住佢哋自爆原來係同鄉。

王桂壎同林健鋒都係廣東南海人，仲係隔籬鎮，以前喺南海商會嘅活動都碰過頭。唔通林健鋒專登搵埋同鄉嚟插競爭法？咁就要佢哋至知嘞！之不過，喺政界都有個南海幫，成員包括前律政司司長梁愛詩、前高官葉澍堃同黃星華，現任官員有黃鴻超，立法會議員就有新民黨主席葉劉淑儀同工聯會葉偉明。

早前一度盛傳王桂壎係下屆律政司司長嘅熱門人選之一，傳吓傳吓就冇咗件事，但話佢有意競逐下屆立法會法律界功能組別嘅消息卻不脛而走。佢初時矢口否認，但近期口風放軟，睇嚟仲喺度諗緊。究竟佢係咪想染指政界同立法會南海幫？大家拭目以待啦！