政情：新立會辦公室難分配
立法會今個暑假搬新屋，趁機全部IT設備都會提升。秘書處尋日專登安排傳媒參觀新IT設施，其中新大樓會新增三十幾部電子資訊站，市民可以透過觸控螢幕睇到即日喺立法會舉行嘅活動、會議同埋全部立法會議員嘅資料，議員簡歷內仲可以直接連接到議員辦公室嘅地圖，等有需要求助嘅市民更加方便。但秘書處嘅示範做到一半，在場記者愈睇愈唔對路，點解地圖顯示一層議員辦公室，有齊各個黨派嘅議員座位嘅？唔通秘書處幫手喺立法會搞「大和諧」？
非也。秘書處解釋，依家成個系統都仲未做完，尋日嘅資料只係求其放落去做個示範畀大家睇，並唔係真實座位表喎！大家聽到個心都定一定，如果唔係要已經「離婚」嘅富貴黨同經濟動力坐埋同一層，白鴿黨又同幾個功能組別議員隔住嚟坐，到時唔止議事廳有火花，分分鐘連辦公室都烽煙四起！