政情：救人英雄劉楚釗紮職
每次港人喺海外遇到嚴重意外或災難，東區醫院急症室主管劉楚釗都會臨危受命，帶領一隊醫護人員救災。呢位救人英雄獲醫院管理局賞識紮職，五月一號起升任港島東醫院聯網總監，代替即將退休嘅現任總監任燕珍。
由早幾年嘅南亞海嘯、台灣九份車禍、埃及車禍、四川地震，以至舊年馬尼拉人質慘劇，劉醫生都擔當重要角色，帶領本港嘅「雷霆救兵」，親赴當地展開救傷工作。佢舊年到馬尼拉協助拯救慘劇傷者時，好果斷咁分析腦部受創嘅梁頌學（Jason）傷勢，即時要求本港腦科專家方道生醫生去當地幫手，成功帶Jason返港就醫。
劉醫生話升職後要睇住聯網轄下嘅醫院，唔可以再隨時候命救災，直言好唔捨得，但相信醫管局大把救災人才，公眾毋須擔心。至於未來工作大計，佢就話要與同事有商有量，聽取民意。
劉楚釗（左一）曾參與多項救災工作，包括○八年親赴四川拯救地震災民。 （資料圖片）