政情：拋戒煙絕橋 象哥自欺欺人

財政預算案建議大幅增加四成煙草稅，煙民怨聲震天。立法會一個小組委員會尋日首次審議加煙稅，煙齡四十年嘅建仔立法會議員「象哥」黃定光聲言反對加煙稅，但竟然又支持政府控煙。咁離奇？

象哥話反加煙稅唔係為自己，而係擔心煙草業從業員嘅生計，又質疑食物及衞生局喺加完煙稅之後，多咗人打戒煙熱線嘅情況，仲自爆佢都曾經打過去，但打去嘅原因純粹係「心思思有件事，遇疑難唔話得畀佢知」，奉勸政府唔好以為打親電話去都係戒煙。

梁卓偉會錯意瘀爆

既然覺得戒煙熱線冇用，咁有乜好橋先？象哥都心思思有件事，唔講唔舒服，獻計話戒煙有兩個方法，一係好似食K仔咁，一食煙就拉去坐監；二係捉啲煙民去照肺，等佢哋睇到自己個肺有幾黑，自然驚到會戒煙啦。點知象哥一個屈尾十，又話覺得食煙就拉去坐監條橋唔掂，事關咁搞法肯定逼爆監倉；又承認唔敢去照肺，因為佢都驚見到自己個肺烏卒卒喎！

任何人聽到象哥咁講，都覺得佢嘅建議擺明係自欺欺人，但與會嘅食衞局副局長梁卓偉竟信以為真，以為象哥真係有意戒煙，即時好得戚咁同象哥講，政府時刻都為象哥準備好。點知象哥即時反窒：「我老婆都時刻準備呀！」梁卓偉碰到一鼻子灰，梗係勁冇癮啦！老實講，象哥唔係戒唔甩煙，而係根本冇打算搣甩呢鋪煙癮。