庸官無可救藥 醫生造反有理

食物及衞生局局長周一嶽又搞出大鑊嘢，近日全城公立醫院醫生都喊打，叫佢落台返屋企瞓覺，今次真係有好戲睇咯。

叮！究竟周一嶽又衰乜嘢，激到班醫生咁嬲呢？咪衰口臭囉。事緣醫管局管理不善，醫護人手極度短缺，一班被迫瘋狂開OT、自言慘過做奴隸嘅前線醫生終於谷爆，醞釀工潮。醫管局高層梗係急急補鑊啦，提出解決方案，但對醫生代表最關注嘅晉升制度同夜更當值津貼問題寸步不讓。本來前線醫生已經過辣雞，點知周一嶽上星期六出嚟大放厥詞，暗寸醫生唔應該為超時補水「斤斤計較」，將醫生抹黑為勢利小人。局長火上澆油吖嘛，醫生咪揭竿「造反」囉！

前線醫生呢幾日紛紛喺Facebook發炮，要求身為頂頭老闆嘅周一嶽就「計較論」道歉，甚至鞠躬落台。有醫生仲大玩「惡搞」創意，搵嚟一張周一嶽開立法會會議時雙眼反白、神情呆滯嘅相，寫住：「周局長，你累了，請你下台回家睡。」

計太一叮話齋，周一嶽口臭闖禍，無關夠唔夠瞓，全因佢冷血同昏庸就真。佢點冷血呢？正如醫生喺網上大反擊爆料，公立醫院「醫生荒」已經嚴重影響醫療服務：「門診只得三分鐘，去看有十三種長期疾病的李伯伯」，「張婆婆因肺炎在死亡邊緣徘徊，而醫生兩小時內卻要巡二十九個病人」……呢啲都係前線醫生嘅血淚控訴，如果周一嶽感同身受，又點會講出咁無情嘅說話？

周一嶽又點昏庸法呢？本港醫療政策喺佢執掌下，醫療事故頻仍，遺失嬰屍、餵錯藥、打錯針、輸錯血、割錯乳房，真係罄竹難書，毋須喺呢度贅言嘞。依家醫生發動杏林革命，醫管局面對嚴峻管治危機，佢無力撲火，反而火上加油，添煩添亂，「庸官」呢頂帽，周一嶽戴上係咪當之無愧呢！其實，點止醫生、市民同太一叮怒氣沖沖，可能醫管局班高層依家私底下鬧得仲勁呀。

醫生都係血肉之軀，要求標準工時、可以適度休息、有時間陪家人享受天倫樂，係人之常情。醫管局唔解決醫護人手短缺問題，前線醫生遲早集體過檔搵銀多又相對舒服嘅私家醫院，到時受害嘅又係冇錢睇私家醫生嘅貧苦大眾。唉，可惜呢啲真正關乎民生嘅事，周一嶽從來聽唔入耳㗎，佢可能轉個頭又同人講，班前線醫生為咗佢一句話咁動氣，太「斤斤計較」嘞！

叮！講多無謂，庸官無可救藥，港府不如就順吓班前線醫生嘅意思，畀周一嶽下台回家睡啦，唔係等到醫護工潮好似福島核電站連環爆，到時想救就遲咯！