SUN世代：拚搏彩妝教主 臨盆前夕唔放假

「如果用天分來形容我依家得到嘅成就，我會話畀一般人聽，勤力比天分更重要。」陳灝而（Janae）十年前創辦「美麗藝術化妝美容學府」，曾挺着大肚子工作，臨盆前一天仍上堂授課。入行二十多年，桃李滿門，生意愈做愈大，生活已步入先苦後甜階段，但她坦言怕悶，「相信都好難退休」。

陳灝而曾經涉足的事業，包括兼職模特兒、婚紗店、化妝美容學校、形象指導、婚禮籌劃顧問，都與「扮靚」兩個字密不可分。「我想做同扮靚有關嘅工作。我對讀書唔係咁大興趣，成績合格已經好滿足。」Janae當年還在中學修讀時，已選定日後要走的道路。她中四開始擔任兼職模特兒，現時進身國際模特兒行列的馬詩慧，與她同屆畢業。「當年佢考第一，我考第七。」

不過，她承認不喜歡幕前工作，但又喜愛表演機會，「既有幕前感覺，又有幕後元素」的化妝業，成為她的心水選擇。「我係一個怕寂寞嘅人，鍾意熱鬧、分享，同明顯嘅讚賞。聽到客人讚賞，都會令我好開心。教人嘅時候，咁多人聽我講嘢，一定熱鬧啦。」

父母遺傳勤力DNA

「我係一個有planning（計劃）嘅人，唔想嘥時間。」懂得珍惜光陰，多得早年身邊一位大姐姐提點：「佢話後生要努力啲，如果早一分鐘努力，就可以早退休。我聽完心諗：係喎，瞓多一分鐘，就會遲一分鐘退休！」

父母本身是勤力工作的人，Janae也受到感染。「Daddy前半生好勤力工作，但不討好，好多同事都怪佢破壞偷懶規矩；到了後半生，佢得到好多下屬尊重，拍檔好信任佢。呢件事令我明白，人生原來係先苦後甜。」回想創辦美容學校BeautyTech初期，由於反應太好，學生太多，頭兩年她從沒有放過一天假；時至今日，她也是每半個月才放一天周日假，「身體上、精神上都好大壓力！」

積極扶助星級徒弟

Janae形容自己的事業已經進入「甜甜哋」的階段，但仍然親力親為，堅持為報讀入門課程的學生授課。她笑說：「每一個學生我都要認識佢，對個客最好嘅，一定係公司老闆！其實啱啱報讀課程嘅學生，亦係最無助、最需要有人幫佢打好個底。呢個係我哋公司嘅獨特文化。就算我病咗，都會延期上課，絕對唔會取消。」

眼見公司生意日漸壯大，Janae目前的心願是希望扶助「星級」化妝師接班。「每年都有二萬個學生報讀課程。喺media界別，估計有一半化妝師都係我學生！我去教會、搭飛機、飲喜酒，都有我嘅學生。我依家企緊嘅位置已經係紅，不過我唔滿足，我想佢哋認識我嘅徒弟。」

目前她正自修營養學，研究「就算忙碌完之後，都仲可以好精神」的秘訣。她說：「日後將美容學校傳畀徒弟後，呢樣嘢可能成為我另一個事業。」

陳灝而小檔案 Janae's Profile

現職：BeautyTech創辦人、校長

榮譽：

香港商業專業評審中心院士（2008年）

美國林肯大學榮譽管理博士（2010年）

公職：

香港化粧品同業協會副會長

香港學術及職業資歷評審局美容業學科專家

香港藝術形象專業學院（HKAI）名譽院長

亞洲專業形象協會（APIA）會長

香港美髮美容業商會常務理事

香港美髮業總會榮譽顧問