政情：林燕玲過檔渣打賣窩輪

由尋日開始，又多一名女主播殺入窩輪界！有「小飛俠」之稱嘅財經台「台柱」Ruby林燕玲正式加盟渣打幫手賣窩輪，出任股票衍生及中介銷售部窩輪銷售副董事一職。

「小飛俠」過檔渣打其實有迹可尋，皆因將佢羅致旗下，就係曾經搵過無綫前新聞主播趙海珠做窩輪生招牌嘅渣打股票衍生及中介銷售部窩輪銷售董事Simon翁世權。幾年前Simon喺舊公司法巴時，就係搵趙海珠做節目推廣窩輪嘞！

對於今次「照辦煮碗」，Simon話由於公司未來會多搞小型講座，而窩輪又係一些複雜投資產品，一直都希望搵個有財經工作經驗同口才了得嘅人，能夠同散戶多作交流，而Ruby做開主播，同散戶溝通應該冇難度。

從過去幾年嘅挖角例子，足以證明「由女主播搖身一變做財金界人士」呢條方程式有幾成功，好似花旗搵前有線財經主播張敏華加盟研究部，而早排財經台主播葉文炘亦跳槽到大和幫手賣輪。