醫局失職玩縱容 濫用白車無王管

人命大過天，救護資源彌足珍貴，縱容濫用等於間接剝奪危急病人嘅生存機會。本港救護車服務長期不敷應用，一直為人詬病，而醫管局更有章不循，任由救護車資源白白浪費，簡直係添煩添亂。

消防處指引寫明，喺過境口岸使用救護車服務嘅病人須送到就近公立醫院處理。實際上，指引形同虛設。過去五年本港救護車奉召到五個過境口岸處理緊急救護服務嘅個案，平均每年五千幾宗，當中有近百分之三並唔係送去離口岸最近醫院求診，情況令人關注。

近期唔少病人被送到就近醫院之後，又要求轉去其他醫院，有啲仲離譜，送到指定醫院之後，連病都唔睇就走人，根本係濫用救護車服務。正如有前線救護員話齋，呢啲人當正白車係的士，有專人服務之餘，連的士錢都慳埋，就算對方擺明濫用，佢哋都冇符。

係咁，消防處指引咪等於廢紙一張？鬼咩，再好嘅措施都要認真執行至有效㗎。消防處救護員會總幹事屈奇安踢爆話，措施收緊咗市民濫用白車嘅機會，弊在公立醫院唔配合，醫護人員成日驚畀人投訴，病人由口岸送到醫院，醫生都未睇就話要轉院，係咁意填份表格，就由另一架救護車送去其他醫院。

叮！消防處救護車唔止數量追唔上服務需求，質量更加唔掂。雖然最近兩年陸續購入新車，但夠鐘退役或者超齡服役嘅老爺車仲有大把，救護車半路死火跪低嘅醜聞，時不時就爆一單。

醫管局把關失職，居然對濫用救護車嘅行為闊佬懶理，萬一有危急病人因為救護車被人濫用，錯過咗搶救嘅最佳時間，搞出人命邊個負責？醫管局咁搞法，直頭係攞病人條命較飛。叮！

醫管局驚人投訴唔肯孭鑊，但係就留低啲爛數要納稅人孭。查實，救護車每次出勤，唔計行車距離，成本至少要二千到三千蚊。家陣每年五千宗過境口岸緊急救護服務個案入面，百分之三即係約一百五十次唔符合指引要求，計落等於嘥咗四十幾萬公帑，都咪話唔得人驚。

冇計啦，醫管局一向唔識珍惜納稅人嘅血汗錢。呢，好似公立醫院急症室因為畀病人拖數而要撇帳嘅數字咁，淨係舊年四月到十月嘅短短半年就有二百三十萬，對上兩個年度每年撇帳三百幾萬。

醫局失職玩縱容，濫用白車無王管。計太一叮話齋，對付呢班倒米壽星只有一招，就係將呢類濫用救護車個案增加嘅公帑支出，喺醫管局高層人工度扣番。叮！