SUN世代：廣告天后好橋打動你

十六年的廣告生涯中，梁芷茵（Lilian Leong）一直以滿腔熱誠，創造一個又一個精彩廣告，感動無數人心。她曾經歷過艱辛、迷失的日子，但仍堅持理想，憑着過人才能與無限創意，現時已躍升為全球最大廣告公司之一的高層，更帶領公司橫掃多個廣告界最高榮譽大獎。登上事業高峰，她並無放慢腳步，更矢言：「會喺呢行一路做落去，希望繼續以廣告打動更多人！」

口齒伶俐兼轉數快的Lilian，天生注定吃廣告這行飯。但原來她主修英文而非廣告，入行是因在機緣巧合下邂逅這個多采多姿的行業，立即被它深深吸引：「嗰時喺公關公司做暑期工，認識咗個主管，之後我畢咗業，佢介紹我去廣告公司，我發覺呢行好有活力，又多樣化，好令人着迷！」　

熱愛工作 陪同事OT

廣告界出名要趕deadline，Lilian初初投身這個行業時，也曾經歷過一段不眠不休的非人生活，她憶述說：「當時為咗要度啲好橋，連續好多個月，日日最多瞓兩個鐘。」

雖然工作艱辛，但她卻非常享受，甚至經常主動陪同事OT，原來動力來自對廣告的熱愛：「呢行充滿創意，冇嘢係會重複！搵到份自己鍾意嘅工，真係畀錢都買唔到，原來返工可以咁開心！」

Lilian在廣告界如坐上火箭，升職比同事快，現時已擔任4As（四大廣告公司）之一的香港區董事總經理，負責管理香港辦事處的運作。事業平步青雲，究竟她有何秘訣？Lilian坦言：「最緊要抵得諗，千祈唔好斤斤計較，成日驚做多啲會蝕底。其實返工每分鐘都係學緊嘢，要爭取同珍惜每個學習機會。」

在工作方面，Lilian看似一直在康莊大道向前邁進，但其實她亦曾遇上難關：「兩年前，我啱啱升做管理層，點知就撞正金融海嘯，一上場就即刻要炒人，我真係做唔出。嗰時真係好擔心、好大壓力！」最終她沒有選擇裁員，反而趁着低成本的環境擴展業務，成立兩個新的分部，結果成績斐然，更成為全港僅僅兩間沒有裁員的廣告公司。

突然迷失 暫別再回歸

靠自己成功把難關化險為夷後，Lilian亦曾經歷過一段迷失時期，離開了心愛的廣告業。「當時係遇上『中年危機』！又升咗職、又加咗人工、又買咗樓，咩都達成晒，突然覺得自己stuck住咗，冇晒目標，好lost！」於是她毅然辭職，尋覓人生意義。那段日子，她每天只有一個行程—學車、健身、美容、按摩……搏殺慣勤力慣的她，又怎能忍受這樣悠閒的生活呢？過了數個月，她已不禁高呼：「真係好悶呀，頂唔順！」

暫別一段時間後，Lilian充足電，強勢回歸廣告界。她去年帶領公司，在廣告界最高榮譽的「康城國際廣告節」中，橫掃十多個大獎，登上事業高峰。她已經定下人生的新目標：「近年我亦開始參與社會服務，覺得好有滿足感！希望之後可以投放更多時間做義務工作，回饋社會。」

梁芷茵Lilian Leong

現　職 李奧貝納（Leo Burnett）廣告公司 香港區董事總經理

學　歷 香港中文大學社會科學學士

公　職 2010-2011民政事務處大型體育活動事務委員會成員，2010-11 EFFIE廣告效益大獎事務委員會成員，2010上海世博事務委員會成員。